Gibawi ni United States President Donald Trump ang plano nga ipasalida sa livestream ang gikatakdang pagpatuman sa firing squad execution kang Nidal Hasan, ang kanhing sundalo sa US Army nga gisentensiyahan og kamatayon tungod sa pagpamusil sa Fort Hood, Texas, kaniadtong 2009.
Una nang gipahibalo sa Pentagon nga ipakita sa internet ang execution, apan giusab ni Trump ang desisyon human sa mga hangyo ug pagsupak gikan sa pipila ka sektor.
Matod ni Trump, gusto niyang ipakita pinaagi niini nga seryoso ang Estados Unidos sa pagpakigbatok sa terorismo. Apan, mipili siya nga dili na ipagawas sa publiko ang pagpatuman sa silot tungod kay daghan ang dili gustong motan-aw niini.
Si Hasan, nga usa ka kanhing Major ug psychiatrist sa US Army, maoy responsable sa pagpamusil sa Fort Hood military base niadtong Nobyembre 5, 2009, diin 13 ka tawo ang namatay ug 32 ang nasamdan.
Kung matuman ang execution sa Disyembre 3, 2026, mahimong si Hasan ang unang miyembro sa US military nga patyon ubos sa military death penalty sukad sa 1961. Mahimo usab siyang unang sundalo nga patyon pinaagi sa firing squad sa US Army sukad sa Ikaduhang Gubat sa Kalibotan.
Bisan gikansela na ang livestream, magpadayon ang gikatakdang execution pinaagi sa firing squad. Ang mga pamilya sa mga biktima gitugotan nga motambong sa personal, apan dili na ipasalida sa publiko ang maong proseso.
