DAVAO CITY – Dismayado si Dr. Ricardo Audan ang medical chief sa Southern Philippines Medical center (SPMC) human makita ang grabe ka daghan sa mga tawo nga nagdasok sulod sa usaka restobar sa may Ilustre Street ning syudad niadtong sabado sa gabii.
Gikanayon ni Audan, nga angayang basulon niini ang nagdumala sa bar gumikan kay kung gipatuman lamang niini ang paglimita sa pagpasulod sa ilang mga customers dili mahimong over crowded ang maong lugar nga iyang gihulagway nga magsilbi isip super spreader.
Angayan usab unta nga gibantayan sa management sa Supladoz restobar ang padayon nga pagtuman sa ilang mga customer sa nag-una nga health protocol sama sa pagsul-ob ug facemask ug pag-obserba sa physical distancing.
Dugang pa ni Audan nga sayo pa kaayo karon aron mag-enjoy ang katawhan gumikan kay naa gihapon ang covid 19 ug labaw sa tanan mitumaw na usab ang bag-ong variant niini nga Omicron BA.2.
Sumala pa ni Audan nga kinahanglan nga barugan sa katawhan ang na-una nang pag-ila nga disiplinado ang mga dabawenyos.
Sa karon ang syudad ang naa na sa alert level 2 diin mas luag na ang mga gipatumang restrictions apan gitugutan lamang ang mga establisamento sa pag-operate ug 50% indoor capacity ug 70% alang sa outdoor venues.
Apan sa nakita sumala pa ni Audan sa mikatag nga video, puno kaayo ang restobar diin halos nagdikit na ang panit sa mga tawo ug labaw sa tanang nakapalabala kaniya ang wala pagsul—ob ug facemask sa mga nahisgutan.
