DAVAO CITY – Miulbo ang kalayo sa usa ka tunghaan sa J.P Laurel Avenue kanto Acacia Street ning Dakbayan sa Davao, pasado ala una sa hapon kagahapong adlawa.
Sumala kang Central Fire Station Commander SFO4 Ramil Guilado nga nagsugod ang pag-ulbo sa kalayo ala 1:26 sa hapon.
Subay usab sa mga gikataho sa mga nakakita, nagsugod ang sunog sa ikaduhang andana sa nasangpit nga gambalay. Daling miresponde ang kabomberohan sa STI College, nga gipanghitabuan sa maong sunog aron pakgangon ang kalayo.
Misaka pa ngadto sa 3rd alarm ang sunog, ug gideklara kining under control alas 2:40 sa hapon. Hinuon, wala naapil og kasunog ang mga kasikbit nga gambalay niini.
Padayon pa usab nga ginasuta sa kabomberohan ug sa kapulisan ang hinungdan sa sunog, apil na usab ang kinatibuk-ang danyos niini.
Gibanabanaan usab nga dunay importanteng records sa naasoy nga tunghaan ang naapil og kasunog.
Wala pay pamahayag ang kadumalaan sa STI College kalabot sa pagkasunog sa ilang campus.
