Gikuwestyon ni Senador Raffy Tulfo ang Department of Trade and Industry o DTI human mahibaloi nga mahimong moabot og pito ka bulan ang pagresolba sa pipila ka reklamo sa mga consumer.
Matud ni DTI Fair Trade Group Assistant Secretary Regino Mallari, hangtod usa ka bulan mahimong molungtad ang mediation, samtang mokabat og unom ka bulan ang adjudication kon dili masulbad ang reklamo sa unang proseso.
Gipangutana ni Tulfo ang maong gidugayon, ilabina sa mga reklamo bahin sa mga guba nga produkto ug sa “No Return, No Exchange” policy.
Matud usab ni DTI Secretary Ma. Cristina Roque, nanginahanglan ang ahensya og dugang pondo aron mapalig-on ang teknolohiya, market monitoring, enforcement ug consumer assistance.
Lakip sa gihatagan og pagtagad sa ahensya ang pagdaghan sa mga produkto nga gibaligya online ug ang presensya sa mga substandard nga produkto sa merkado.
Misupporta hinuon si Tulfo sa dugang nga pondo alang sa DTI tungod sa giingong kakulang sa personnel sa ahensya.
Gipunting nga importante ang dugang nga resources aron mapalambo ang kapasidad sa DTI sa pag-atiman sa mga consumer complaint ug pagpatuman sa mga lagda sa merkado.
Nagpadayon ang paningkamot sa DTI sa pagpalig-on sa mga serbisyo alang sa consumer protection samtang nagkadaghan ang mga reklamo ug transaksyon sa online platforms.
