DAVAO CITY – Gipatas-an pa sa usa ka libo ka pesos ang gipatumang multa sa mga misupak sa ordinansa sa dakbayan sa Mati nga adunay kalabutan sa gipatumang health protocols batok sa covid-19.
Subay sa gi-amendahang ordinansa, pahamtangan dayon ug usa ka libo ka pesos ang makalapas sa health protocols ug kung ugaling dili makabayad sa multa, bilanggo-on kini sulod sa 36 ka oras.
Kung kahinumduman nga kaniadto, community service ug seminar lamang ang ipahamtang nga silot apan sa pagkakaron usa ka libo ka pesos na ang multa.
Samtang sa ikaduhang paglapas, pamultahon kini ug dos-mil pesos o dili ba kaha mabilanggo ug usa ka bulan.
Tipik lamang ang nahisgutan nga lakang gumikan pa gihapon sa padayon nga pagsaka sa mga nangatakdan ug covid-19 ingon man dungan sab sa pagpailalom sa lalawigan sa Modified Enhanced Community Quarantine (MECQ).
