Gibasura sa International Criminal Court ang hangyo sa kampo ni kanhing Pangulong Rodrigo Duterte nga obligahon ang pagbutang og “Expert verification reports” sa open-source ug user-generated evidence nga isumite sa tribunal.
Nanghangyo ang defense team nga usbon ang E-Court Protocol sa ICC aron maapil ang “Expert verification” sa usa ka metadata field sa electronic discovery system sa Registry sa korte.
Ang maong dugang proseso, gikonsiderar sa Trial Chamber III nga mahimong hinungdan sa paglangan sa pagsugod sa trial tungod sa kadaghan sa mga ebidensyang kinahanglan susihon.
Pagpasabot sa Chamber nga matubag gihapon ang kabalaka sa depensa pinaagi sa kasamtangang proseso diin mahimong kuwestiyonon sa mga partido ang admissibility ug uban pang sumbanan sa ebidensya sa panahon nga isumite kini o dayon human mailhan ang isyu.
Gipagawas ang maong desisyon sa 7-pages ruling nga gipetsahan og Septiyembre 27, 2026.
Nagpadayon ang mga preparasyon alang sa pagsugod sa trial ni Duterte sa ICC, nga gikatakdang magsugod sa Nobyembre 30.
Samtang, magamit gihapon sa mga partido ang mga mekanismo sa korte sa pagkuwestiyon sa admissibility ug uban pang aspeto sa mga ebidensyang ipresentar atol sa proceedings.
