DAVAO CITY – Subling mipahimangno si Davao City Mayor Inday Sara Duterte-Carpio sa mga residente nga mouli dinhi sa dakbayan nga kinahanglan mupailalom una kini sa swab test gikan sa lugar diin kini naggikan ilabi na nga lauman sumala pa ang pagdagsa sa mga pasahero karong Christmas season.
Una ng gibutyag sa Mayor nga kadtong mga pasahero nga walay ma-presenta nga RT-PCR result pag-abot sa Davao International Airport, mamahimo sumala pa nga mopailalom niini og libre pag-abot dinhi sa siyudad apan kinahanglan nga hulaton kini sulod sa 24 hours sa holding facility.
Gitataw sab sa Mayor nga dili na matud pa kinahanglan og dugang health team sa airport gumikan kay aduna na matud pay tukma nga ihap sa mga pasahero nga laumang muabot sa dakbayan matag adlaw.
Gani, igo matud pa ang ihap sa mga crew nga mohupot sa gidaghanon sa mga pasahero nga modagsa sa siyudad.
Gipasabot sab sa Mayor nga ang mga returning residents dili na kinahanglan nga mokuha og travel authority.
