DAVAO CITY – Gi-andam na karon sa City Transport and Traffic Management Office (CTTMO) ang plano alang sa pagbutang ug mga bike lane sa siyudad isip kabahin sa “New Normal” gumikan sa krisis nga hatud sa Covid-19.
Sumala pa kang CTTMO head Dionesio Abude nga nakadawat na siya ug direktiba gikan kang Mayor Inday Sara Duterte-Carpio kalabot sa maong plano ilabi na nga mamatikdan nga ubay-ubay ang mga nagabisekleta karong panahon sa quarantine.
Apan gikanayon ni Abude nga kinahanglan pa nila nga tun-an ang maong lakang ilabi na nga gagmay ang mga dalan sa dakbayan.
Daghanan sab ang nagpadayag ug kalipay ilabi na kadtong mahiligon nga magbisikleta gumikan kay gawas nga mamahimong luwas na ang ilang pagbiyahe, maka-ehersisyo pa sila matag adlaw.
