Dakong pasalamat ang pipila ka jeepney drivers sa Davao City sa pagpatuman sa bag-ong plete sugod karong Septiyembre 28, 2026, apan gitinguha nila nga madungagan pa kini aron mas makatabang sa ilang inadlaw nga panginabuhi.
Sumala sa mga drayber, mas dako unta ang ilang mauli sa pamilya kung P2 ang madugang sa plete, ilabina tungod sa padayon nga pagsaka sa presyo sa lana.
Matud pa nila, mokabat lamang sa P350 hangtod P450 ang ilang mauli kada adlaw human maibanan sa gasto sa operasyon ang ilang kita.
Samtang, alang sa ubang drayber, mokabat na lamang sa P250 hangtod P300 ang mauli sa pamilya tungod sa mahal nga presyo sa lana.
Dako na usab nga tabang alang kanila ang nadugang nga P1 sa plete, apan gitinguha gihapon nila nga mahimong P2 kini aron mas maminusan ang epekto sa taas nga gasto sa ilang panginabuhi.
Subay sa bag-ong pamasahe sa Land Transportation Franchising and Regulatory Board o LTFRB, P14 ang plete sa traditional jeepney alang sa unang upat ka kilometro ug P2 sa matag sunod nga kilometro.
Alang sa modern jeepney, P17 ang plete sa unang upat ka kilometro ug P2.40 sa matag sunod nga kilometro.
Sa pagkakaron, gilauman sa mga drayber nga ang bag-ong plete makatabang sa ilang inadlaw nga kita, ilabina sa pag-atubang sa gasto sa gasolina, pagmentinar sa sakyanan ug mga panginahanglanon sa pamilya.
