DAVAO CITY – Plano karon sa lokal nga panggamhanan nga magdugang ug pasilidad diin ipahimutang kadtong mga patients under investigation (PUI) luyo sa coronavirus disease (Covid-19) pandemic.
Kahinumduman nga ang mga PUI centers sa siyudad nahimutang sa Malagos Rehab Center, La Vida Inn sa Maa, Alternative Learning School (ALS) kilid sa People’s Park, Bureau of Fire Protection (BFP) duol sa Malagos Rehab Center, ug Queensland Hotel nga nagtanyag ug 240 ka mga lawak ngadto sa lokal nga panggamhanan.
Apan gikanayon ni Mayor Sara Duterte, nga kinahanglan pa nila nga magdugang ug laing pasilidad nga maka-cater pa gihapon ug PUIs.
Nasayran nga ang Malagos Rehab Center mamahimong maka-akomodar ug 28 pasyente.
Samtang ang La Vida Inn, mamahimong maka-akomodar sumala pa ug hangtud sa 26 ka mga PUIs samtang ang ALS center makaakomodar lamang ug positive Covid-19 patients nga mild cases.
Gikanayong ang mga Covid-19 positive patients sa Southern Philippines Medical Center (SPMC) nga adunay mild symptoms ang ibalhin sa ALS.
Samtang ang BFP ug Queensland ang padayon pa karon sa ilang construction works.
