DAVAO CITY – Gipasalig sa regional police director nga imbestigahan ang nahitabong komosyon sa UCCP Haran kini human nga pipila sa mga kabanay sa mga lumad ang misulay pagluwas sa ilang kabanay nga anaa pa gihapon sulod sa compound.
Sumala pa kang Brig. Gen. Filmore Escobal, director sa Police Regional Office XI, nga subay sa ilang inisyal nga impormasyon naglusad lamang og rescue operation sa ilang mga kabanay ang mga miyembro sa paramilitary nga Alamara.
Una ng gibutyag ni Datu Guibang Apoga, nanguna sa pag-rescue kauban ang manobos, nga buot nila nga luwason ang ilang mga kabanay ug paryente nga buot na matud pang mobalik sa ilang Barangay.
Laraw karon sa police officer nga subayon kung ang mga pamilya sulod sa compound ang napugos lamang nga magpabilin nga supak sa ilang kabubut-on.
Sa higayon nga adunay kamatuoran, ang mga organizers ug UCCP leadership posibleng mag-atubang og kasong illegal detention, child abuse ug human trafficking.
Gibarugan sa opisyal nga ang Haran compound usa ka peke nga evacuation center ug kinahanglan nga pugngan ang mga organizers nga magpadayon sa ilang mga sayop nga binuhatan.
