DAVAO CITY – Gipasigarbo sa Eastern Mindanao (EastMinCom) ang pagtahan sa mga kanhi rebelde pipila ka adlaw ayha ang pagtagbo sa bag-ong tuig.
Kahinumduman nga anaa sa 12 ka mga sakop sa New People’s Army (NPA) ug unom ka mga Militiang Bayan (MB) ang mibalik sa sabakan sa kagamhanan sa mga nagkadaiyang unit sa EastMinCom sukad Disyembre 23 hangtud 26.
Una ng nasayran nga anaa sa tulo ka mga sakop sa komunistang grupo ang mitahan sa San Fernado Bukidnon ngadto sa mga tribal leaders, local officials, ingon man sa mga business leaders sa Matupi, San Fernando, Bukidnon.
Sumala pa kang Lt. Col. Ezra Balagtey, spokesperson sa EastMinCom, nga ila gilayon nga gi-turn over ngadto sa 88th Infantry Battalion ang mga nahisgutan alang sa custodial debriefing.
Sa pikas nga bahin, unom ka mga MB members gikan sa Sitio Tambo, Barangay Binicalan San Luis, Agusan del Sur, ang mitahan sa 26th Infantry Battalion, San Luis Police Station, ug Municipal Task Force-ELCAC San Luis kaniadtong Disyembre 23.
Gikanayon ni Balagtey nga ang NPA medic sa Panabo City nga nailang si Angel ang mitahan pinaagi sa inisyatibo ni Davao del Norte Representative Allan Dujali ug Governor Edwin Jubahib.
Sa New Bataan, Davao De Oro, usa ka miyembro sa organizing committee sa dakbayan sa Davao nga nailang si alias Bobby ang nagdala sa iyang 9mm pistol dihang mitahan kini sa 66th Infantry Battalion kaniadtong Disyembre 25.
Laing tulo ka mga NPA sab ang mitahan sa local officials sa Bislig, Surigao Del Sur dayon gi-turn over ni 75th Infantry Battalion.
Samtang kaniadtong Disyembre 26, upat ka mga lain pang NPA rebels ang nasikop sa mga sakop sa Davao Sur Police Office ug 39th Infantry Battalion sa Sitio Mainit, Barangay Sibulan, Sta Cruz, Davao Del Sur.
Gitataw sab ni Lt. Gen. Felimon T. Santos Jr., commander sa EastMinCom, nga ang sunod-sunod nga pagtahan sa mga rebelde pagpamatuod lamang nga epektibo ang local peace Initiatives sa nagkadaiyang local government units.
