Nagpabiling co-accused ni Senator Jinggoy Estrada si kanhing Department of Public Works and Highways o DPWH Secretary Manuel Bonoan sa graft case nga pending sa Sandiganbayan Second Division.
Kumpirmado kini sa prosecution atol sa pagdungog kaniadtong Martes, Septyembre 29, 2026 samtang gihulat ang aksyon sa Office of the Ombudsman sa ilang rekomendasyon kabahin sa sunod nga lakang sa kaso.
Una nang gisalikway sa Sandiganbayan kaniadtong Agosto 3 ang mosyon sa prosecution nga tangtangon si Bonoan isip akusado sa maong kaso.
Pagpasabot sa korte nga mahimong maapektuhan ang mga depensang mahimong gamiton ni Estrada kung tangtangon si Bonoan isip kapwa akusado.
Hinuon, giklaro sa korte nga wala niini sirad-i ang posibilidad nga mahimong prosecution witness si Bonoan sa maong kaso.
Wala usab nagpasabot ang desisyon sa korte nga nahukman na ang kredibilidad o gibug-aton sa posibleng testimonya sa kanhing kalihim.
Pormal nga gipasaka sa Ombudsman kaniadtong Mayo 28 ang graft ug plunder charges batok kang Estrada ug Bonoan tungod sa giingong iregularidad sa budget insertions ug kickbacks.
Nalambigit ang mga alegasyon sa DPWH infrastructure ug flood-control projects nga gilakip sa 2025 national budget.
