DAVAO CITY – Nakatala sumala pa ang Police Regional Office (PRO)-Davao og duruha ka indiscriminate firing incidents sa rehiyon apan walay natala nga casualties.
Sa report gikan sa PRO-Davao, ang unang insidente gikalambigitan sa usa ka security guard nga gikanayong nagpaboto sa iyang armas.
Una ng naila ang nahisgutan nga si Gentiles Vincent Redito, lalaki, 37 anyos, minyo ug residente sa Purok 1, Kinamayan, Sto. Tomas, Davao del Norte diin mag-atubang og kaso tungod sa illegal nga pagpaboto.
Sa inisyal nga imbestigasyon sa otoridad, nahitabo ang insidente sa C55 Realty Incorporated sa Matina Aplaya, ning siyudad diin anaa sumala pa sa iyang duty ang security guard dihang aksidente niini nga napabuto ang iyang armas ug miigo sa salog sa nahisgutan nga establisyemento.
Mihatud kini og alarma ngadto sa mga customer hinungdan nga miresponde gilayon sa lugar ang mga sakop sa Intelligence Branch of the Davao City Police Office (DCPO).
Narekober sa posisyon niini ang usa ka unit Rock Island Shotgun uban ang usa ka buhing bala.
Apan nakagawas gilayon kini sa presohan human nga walay miduso og reklamo batok kaniya.
Sa pagpanubay sa dokumento, legal sumala pa ang gihuptan nga armas niini.
Sa pikas nga bahin, nahitabo ang lain nga aksidente nga gikalambigitan sa usa ka miyembro sa Barangay Peacekeeping Action Team (BPAT) gikan sa Barangay Magsaysay, Carmen, Davao del Norte.
Diin usa ka Aldrin Torres Carillo, 18, ulitawo, laborer ug residente sa Purok 3-A sa nahisgutan nga lugar.
Gipaboto sumala pa sa suspek ang iyang armas atubangan mismo sa iyang amahan nga si Allan A. Carillo sa ilang panimalay.
Narekober sa posisyon niini ang usa ka unit sa homemade handgun o mas naila nga sumpak nga adunay usa ka fired cartridge case nga gituohang iya sa .38 nga armas. Temporaryo nga gibalhug sa Carmen Municipal Police Station ang suspek ug gi-andam na ang kaso nga iduso batok kaniya.
