DAVAO CITY – Laraw karon sa Davao City Vices Regulation Unit (VRU) nga iduso ang hingpit nga pag-ban sa pagpamaligya ingon man paggamit sa electronic cigarettes (e-cigarettes) dinhi sa siyudad human nga aduna nay namatay tungod sa paggamit niini dinhi sa nasod.
Sumala pa kang VRU head Ashley Lopez nga ayha pa man ang nahimong kamanduan ni Pangulong Rodrigo Duterte nga idili na ang paggamit niini sa mga pampublikong lugar, nagpatuman na matud pa og pagdili niini ang ahensiya ug gani gilakip na kini sa gi-amyendahan nga City Comprehensive Anti-Smoking Ordinance.
Gitataw sab sa health official nga ang labing una nga kaso sa dalagita nga namatay tungod sa paggamit og Vape, usa ka pagpamatuod nga dili luwas ang nahisgutan nga produkto.
Hinuon gitino sa opisyal nga bisan suportado nila ang pag-ban sa pagpamaligya ug paggamit og Vape, kinahanglan pa gihapon nga magpagula og executive order o city ordinance kalabot niini.
Sa kasamtangan, nakatala sumala pa ang VRU og kapin 9,000 apprehensions sa bisan unsa man nga klase sa kalapasan niini sukad Enero hangtud Agosto ning kasamtangan nga tuig diin 80 percent sa nahisgutan nga mga indibidwal ang nakalapas sa anti-smoking ordinance.
