DAVAO CITY – Gipahugtan na karon sa Davao City Police Office (DCPO) ang pagpatuman ug hugtanon nga seguridad sa siyudad human ang sunod-sunod nga insidente sa gang riots sa pipila ka mga lugar sa dakbayan.
Sumala sa DCPO nga gipakusgan na nila karon ang ilang security countermeasures human nga pipila sa mga indibidwal ang nabiktima karon sa gang riots ug whipping incidents ilabi na sa areas sa Sasa, Agdao ug Bucana ning siyudad.
Nagapahigayon na matud pa karon ug Ronda patrol operations ang kapulisan diin tumong sumala pa niini nga batukan ang robbery, mga kawatan, ug uban pang klase sa krimen diin kaabag nila ang mga Barangay Tanods.
Kanunay sab sumala pa nga gipatuman sa kapulisan ang city ordinances sama sa curfew on minors, anti-smoking, liquor ban, ug road clearing operations sa mga urban areas sa siyudad diin sagad nga mahitabo ang mga krimen panahon sa kagabhi-on.
Luyo sumala pa sa nahitabo karon sa dakbayan , gipasalig sa kapulisan nga ilang gihimo ang tanan aron lamang ma-protektahan ang publiko.
Nanawagan sab ang kapulisan nga bantayan ug pahimangnoan ang mga ilang mga anak nga likayan ang pagsulod sa mga gang o grupo nga sagad malambigit sa kagubot.
