DAVAO CITY – Gikatakdang makigtigom ang Public Safety and Security Command Center (PSSCC) ug City Health Office sa mga nanag-iya ug resort ingon man hotels ning siyudad lakip na sa mga coastal communities aron nga malikayan ang polio.
Sumala pa kang PSSCC deputy head Angel Sumagaysay, dakong tabang kini aron nga matubag ang pangutana sa mga kliyente ilabi na kadtong adunay mga negosyo sa swimming pools.
Una na matud pa nga nakadawat ug daghanang tawag ang ilang buhatan aron nga mangutana sa mga tukma nga sumbanan ilabi na dihang migula ang resulta nga nagpositibo sa nahisgutan nga virus ang Davao river.
Gawas sa mga establisyemento nga adunay swimming pools, imbitado sab ang mga barangay kapitan, Environmental Management Bureau sa Department of Environment and Natural Resources, Department of Health XI, Barangay ug Cultural Communities Affairs Development sa City Mayor’s Office.
Gitataw sab ni Sumagaysay nga gimonitor nila karon ang mga aktibidad sa siyudad ilabi na kadtong adunay kalabotan sa seguridad sa katawhan.
Isumite sab dayon sa ahensiya ang ilang report ngadto kang Mayor Inday Sara Duterte human ang maong tigom.
