Nakumpiska sa Criminal Investigation and Detection Group o CIDG XI ang mga sigarilyo nga gituohang walay BIR tax stamps ug Graphic Health Warning Signs gikan sa usa ka tindahan sa Barangay Gabi, Compostela, Davao de Oro niadtong Septiyembre 22, 2026.
Gibanabana sa CIDG XI nga mokabat sa P150,000 ang kantidad sa mga nakumpiskang sigarilyo nga nakuha atubangan sa tag-iya sa maong tindahan.Gikustodiya na sa CIDG XI ang mga nakumpiskang produkto ug gikatakdang ipasa sa Bureau of Internal Revenue o BIR Davao del Norte alang sa hustong disposisyon.
Sumala sa CIDG XI, gihimo ang operasyon isip kabahin sa OPLAN MEGASHOPPER ug CIDG Intensified Anti-Criminality Operation, uban ang Compostela Municipal Police Station ug BIR Region XI.
Gibutyag ni PLTCOL Ariel Huesca, Acting Regional Chief sa CIDG RFU 11, ang kamahinungdanon sa koordinasyon tali sa mga ahensya sa pagpatuman sa balaod aron mas mapalig-on ang kampanya batok sa ilegal nga mga produkto sa tabako.
Sa pagkakaron, padayon ang pagproseso sa mga nakumpiskang sigarilyo samtang gipaabot ang pag-turnover niini sa BIR alang sa tukmang aksyon ug disposisyon.
