DAVAO CITY – Hugtanon nga seguridad ang gipatuman sa otoridad kagahapong adlawa dungan sa gipahigayon nga inquest proceeding sa Digos Prosecutor Office batok kang Arvin “Jun Blanco” Malaza ug sa mga kaubanan niini.
Kahinumduman nga tulo ka mga kaso ang giduso batok sa mga nahisgutan nga gilangkuban sa Large Scale Estafa; illegal possession of firearms ingon man kalapasan sa Securities and Exchange Commission (SEC) regulation.
Nasayran nga mikabat sa walo ka mga indibidwal ang nasikop atol sa gipahigayon nga operasyon sa mga sakop sa National Bureau of Investigation (NBI) 11 batok sa mga nahisgutan diin pipila niini ang naatlan lamang sa estasyon sa radyo dihang miabot ang otoridad.
Human ang Inquest proceeding, gilayon sab dayon nga gidala pagbalik dinhi sa dakbayan ang walo ka mga dinakpan kalakip na si Jun Blanco aron nga ikustodiya sa NBI-11 samtang padayon nga idungog ang ilang kaso.
Positibo ang gilusad nga operasyon sa otoridad human nga nakuha sa iyang posisyon ang pipila ka mga ebidensiya nga gilangkuban sa money counter, papeles, marked money ug daghanan pa. Una na sab nga migula ang impormasyon nga mibalik na ang operasyon sa KAPA bisan nga wala mihatag ug pagtugot niini ang SEC.
