DAVAO CITY – Gikanayon sa usa ka opisyal sa kasundalohan nga anaa na sila karon 80 percent sa ilang target nga malimpiyohan ang dakbayan batok insurhensiya sulod karong tuiga human ang nahimong direktiba ni Davao City Mayor Sara Duterte-Carpio.
Sumala pa kang 1003rd Infantry Brigade commander Colonel Nolasco Mempin nga ang mga area sa Paquibato, nga gihimong kota sa New People’s Army (NPA) ang malinawon na sa kasamtangan ug wala silay natalang impormasyon nga adunay gihimo ang mga rebelde.
Hinuon aduna silay nadawat nga report nga adunay sightings ug presensiya sa armed group, nga gikan sumala pa sa Guerilla Front 55 nga misulay sumala pa pag-recover sa Paquibato area nga nagsilbi nila nga kampo sulod sa taas-taas nga panahon.
Sa kasamtangan, gipalig-on sumala pa sa kasundalohan ang ilang community support programs (CSP) sa ikatulong distrito ning siyudad ug sa pipila ka mga area of responsibility nga dili sakop sa dakbayan sa Davao sama sa Bukidnon ug Davao del Norte.
Subay sa record, aduna pa gihapoy 16 ka mga barangay sa ikatulong distrito ang gikonsidera nga conflict-affected apan padayon nila nga gipatuman ang CSP aron nga mapugngan ang impluwensiya sa mga komunista sa area diin ang Pulang Bagani Company (PBC) 2 ug 3 ang nag-operate.
