DAVAO CITY – Patay na nga nakaplagan ang usa ka mag-uuma nga napaakan ug Banakon o King Cobra samtang nabiktima nanghagbas ug sagbot sa iyang uma sa Kilometer 5, Barangay Bolton, Malalag, Davao del Sur.
Giila sa kapolisan ang biktima nga usa ka Rico Cabanero Canoy, 27 anyos, menyo, mag-uuma, nanimoyo sa Purok 5, Barangay Bolton, lungsod sa Malalag, Davao del Sur.
Nasayran sab gikan sa kaipon sa biktima Renalyn Logronio nga mga alas 12:00 sa udto migikan sa ilang pinoy-anan ang biktima aron nga manghagbas sa ilang uma nga dunay igo nga gilay-on gikan sa ilang balay.
Mibati ug kabalaka ang pamilya sa dihang wala na makapauli alang sa panihapon ang biktima.
Ilang gisuhid ang dapit diin posibling didto nanghagbas ang biktima apan wala gayud nila igkita. Mibalik sila sa pagpangita sa biktima mga alas 6:00 sa buntag ug nakita nga dunay marka nga pinaakan sa bitin.
Samtang Gikatuohan ni Carlos Canoy, 62 anyos, amahan sa biktima nga naglingkod ug nagpahulay ang biktima sa dihang gipaak sa lala nga bitin sa kilid ug sa dihang giwakli niini ang bitin sa bukton na sab siya gipaak niini. Kini basi sa ilang nakita nga maayong pagkahimutang ang lagaraw ug ang kaw-it ngagigamit niini sa pagpanglampas.
