DAVAO CITY – Gibarugan sa mga magtutudlo sa Salugpongan Tatanu igkanugon Learning Center nga wala silay kalabutan sa komunistang grupo ug nanawagan nga bakwi-on na ang suspensiyon order batok sa pipila nila ka mga tulonghaan.
Gibutyag sab sa kadumalahan sa Salugpongan nga buot lamang nila nga tabangan ang mga batang lumad nga magbaton ug maayong edukasyon.
Gipanghikak sab nila ang pasangil nga nagatudlo sila sa mga batang lumad ug mga idolohiya ug kung paunsa mag-rebelde batok gobyerno.
Samtang gibutyag sab ni Jenielito Dodong Atillo, tigpamaba sa Department of Education (DepED) 11, nga nadawat na nila ang tubag sa Salugpongan sa ilang gipagula nga show cause order sa mga tulonghaan niini.
Apan gibarugan ni Atillo nga pabilin nga suspendido ang nahisgutan nga tulonghaan hangtud nga wala pay ipagula nga desisyon ang DepEd kalabot niini.
