DAVAO CITY – Naglaom ang Regional Land Transportation Office (LTO) nga maresolba ang license plate backlog sulod karong tuiga kini tungod aduna na silay lima ka plate-making plants nga dungan nga nag-operate sa central office.
Sumala pa kang LTO 11 Assistant Regional Director Neil Cañedo nga sa milabay nga bulan sa Marso, nakapalit ang central office ug bag-ong robotic plate production machines nga adunay katakos nga makamugna ug hangtud 700 license plates matag oras.
Sa walo ka oras nga shift matag adlaw, mamahimong makamugna ang maong makina ug 5,600 plates.
Tungod niini, gipasalig sa central office nga wala nay plate backlog sa tuig 2020.
Sa milabay nga bulan sa Marso ning tuig kasamtangan, nakahimo matud pa ang LTO ug 1.7 million vehicle plates aron nga ma-solusyonan ang eight million backlogs.
Gitataw sab ni Jun Antonio, chief sa LTO 11 Law Enforcement Division, sagad sa mga motorista pakya nga makuha ang ilang mga plaka gumikan kay wala gipahibalo ang mga nahisgutan sa ilang dealers.
Samtang nanawagan sab si Cañedo sa mga motorista nga naka-rehistro sa Hulyo 2016 hangtud 2017 nga i –claim na ailang plaka kini gumikan kay adunay pay 3,800 unclaimed license plates sa ilang buhatan. Gisugdan na sab karon sa LTO 11 ang flag-down ug pagsikop sa mga motorista nga walay plaka sukad sa unang quarter ning tuig kasamtangan.
