Modangop sa Supreme Court ang Office of the Vice President (OVP) aron kuwestiyonon ang desisyon sa Commission on Audit (COA) nga nagpabiling balido ang disallowance sa kapin ₱73 milyong confidential funds nga gigasto niadtong 2022.
Sumala kang defense counsel Atty. Michael Poa, gipamatud-an sa 15-page resolusyon sa COA ang Notice of Disallowance tungod sa giingong pagkapakyas sa OVP sa pagsunod sa mga lagda sa paggamit sa confidential funds.
Plano sa OVP nga mosang-at og petition for certiorari ubos sa Rule 65 aron ipasusi kon adunay grave abuse of discretion sa pagpagawas sa maong resolusyon. Pinaagi niini, ilang kuwestiyonon ang legalidad sa aksiyon sa COA.
Gipasabot ni Poa nga giandam na nila ang posibilidad nga dili pabor ang desisyon sa OVP. Wala pa usab siya makakonsulta kang Vice President Sara Duterte kabahin sa sunod nilang lakang, busa mokonsulta una sila kaniya sa dili pa pormal nga mosang-at sa petisyon.
Giinsistir usab sa abogado nga aduna pay ubang legal nga remedyo nga mahimong gamiton sa OVP ug sa mga indibidwal nga naapektuhan sa disallowance.
Ang maong isyu may kalabotan usab sa confidential funds nga gilakip sa mga alegasyon sa impeachment case batok kang Duterte. Apan, ang pagkuwestiyon sa COA ruling pinaagi sa Supreme Court usa ka lahi nga legal nga proseso gikan sa impeachment proceedings.
