Nagkadaghan ang mga estudyante sa Davao City nga nakabenepisyo sa “Libreng Sakay para sa Edukasyon” program sa Liga ng mga Barangay nga gipangulohan ni January Duterte. Gawas sa mga libreng bus nga nagserbisyo sa publiko, mokabat sa 26 ka school service vehicles ang gitugyan sa nagkadaiyang barangay aron maserbisyohan ang mga estudyante sa nagkalain-laing eskwelahan sa siyudad.
Base sa mga bag-ong post sa Barangay Panacan ug Barangay Talomo Proper, gigamit na sa mga estudyante ang maong serbisyo isip alternatibong sakyanan padulong ug pauli gikan sa eskwelahan. Pinaagi niini, makamenos sa pamasahe ang mga estudyante ug makatipid sa ilang adlaw-adlaw nga baon, nga magamit alang sa pagkaon, school supplies, ug uban pang importanteng panginahanglan.
Ang programa kabahin sa mga paningkamot sa paghatag og tabang sa mga estudyante pinaagi sa mas sayon ug walay bayad nga transportasyon, ilabi na sa ilang adlaw-adlaw nga pag-adto sa eskwelahan.
