DAVAO CITY – Gipahimo-an ug lakang sa kapolisan ni Tagum City Mayor Allan Rellon ang kamando-an sa Securities and Exchange Commission (SEC) nga paserhan ang pipila ka mga investment company nga nag-operate sa dakbayan sa Tagum.
Subay kini sa kamando-an sa Department of Interior and Local Government (DILG) ngadto sa mga Local Executives ug mga Police Directors nga ipailalum sa cease and desist order ang pipila ka mga investment companies gumikan kay wala kini’y pagtugot sa SEC.
Sumala pa kang Rellon gi-deputized sila sa SEC aron nga mo-abag sa pagpasera sa opesina sa pipila ka mga investment company nga naglihok sa ilang siudad.
Gipasalig ni Mayor Rellon nga mahatagan gayud kini ug katumanan gumikan kay moduso sab siya ug report kalabot niini ngadto sa buhatan sa DILG.
Una na nga nagbahad si DILG Secretary Alex Roldan nga manubag sa balaod ang mga local chief executive ug kapolisan nga mapakyas sa pagpatuman sa pagpasira sa mga buhatan sa mga dili legal nga mga investment scheme sama sa KAPA.
