DAVAO CITY – Subling mopatuman ug water service interruptions ang Davao City Water District (DCWD) karong umaabot nga Hwebes ug Biernes.
Pinasikad sa advisory sa Water District mawad-an ug supply sa tubig ang tipik sa Purok 4, Sitio Nalum sugod Mayo 23 gikan sa alas 9:00 sa buntag hangtud sa alas 4:00 sa hapon.
Apektado niini ang kanto Libby Road doul sa Dumoy production wheel number 31 hangtud sa kanto Fernandez St. Gikatarungan sa DCWD sa nahisgutan nga pagkawala sa supply sa tubig mao ang pagpahimutang nila ug bag-o nga pipeline sa tumong ug tuyo nga mokusog ang agas sa tubig sa Fernandez St., Purok 4, Sitio Nalum, Barangay Baliok.
Samtang sa adlaw nga Biernes low water pressure hangtud sa pagkawala sa supply sa tubig sa Tibungco Relocation Phase II.
Magsugod kini sa alas 8:00 sa buntag hangtud sa alas 5:00 sa hapon o siyam ka oras nga pagka-wala sa supply sa tubig sa nahisgutan nga dapit.
Gikatarungan sa DCWD ang pag-disinfect ug paghinlo sa Water for Life Tibungco Steel tank number 1 aron nga maseguro nga hinlo ug luwas ang tubig nga imnon sa mga konsumante.
