Gipadayag ni Davao City Mayor Sebastian “Baste” Duterte nga wala siyay kasayuran nga adunay interes sa GenCorp Industries Inc. ang iyang igsuon nga si Vice President Sara Duterte.
Nahisgotan kini atol sa testimonya ni PhilGEPS Electronic Government Procurement Operations Division Chief nga si Rendell Sopeña nga nakakuha ang GenCorp og 49 ka government contracts nga nagkantidad og ₱35.878 milyon gikan Hulyo 2022 hangtod Hunyo 2026.
Lakip niini ang 15 ka kontrata sa Davao City Government nga mokabat sa ₱34.2 milyon samtang mayor pa si Baste.
Gipunting ni lead prosecutor Gerville Luistro nga si Mayor Baste mipirma sa Bids and Awards Committee resolution nga adunay kalabotan sa maong mga transaksyon.
Apan, gikanayon sa alkalde nga hapsay ug subay sa proseso ang 19 ka kontrata sa GenCorp sa siyudad nga mokabat sa ₱33.26 milyon.
Samtang, gipakita sa Securities and Exchange Commission records nga wala makita ang ngalan ni VP Sara isip incorporator o stockholder sa GenCorp sa mga corporate documents niini gikan 2020 hangtod 2025.
Apan sa iyang Statement of Assets, Liabilities, and Net Worth, gideklara sa Bise Presidente ang iyang kaugalingon isip incorporator o stockholder sa GenCorp gikan 2016 hangtod 2025.
Gipanghimatuod sa prosecution nga adunay kalainan tali sa mga SEC records ug SALN ni VP Sara, nga kabahin sa alegasyon sa iyang kapakyasan sa pagdeklarar ug pag-divest sa iyang business interests.
Matud usab ni private prosecutor Lorna Kapunan nga isip mayor, “ought to know” si Baste bahin sa mga transaksyon sa GenCorp ug gitawag nga “confession” ang iyang pag-ingon nga wala siya kahibalo.
Kahinumdoman, gipatawag sa impeachment court si Baste aron motestigo sa Septiyembre 28 hangtod 30 ug magdala sa mga rekord sa Davao City Government kabahin sa GenCorp ug ubang kompanya nga nag-operate og Jollibee branches.
