DAVAO CITY – Ipailalum sa laboratory examination ang 400 ka mga langgam ug hayop nga gikan sa Indonesia ug nakompiska sa Department of Environment and Natural Resources (DENR) Eleven.
Tumong niini nga masayran kung duna ba kini’y dala nga sakit o wala.
Mahinumduman nga nakadawat ug impormasyon ang DENR kalabot sa gatusan ka mga hayop nga gikan sa Indonesia ang illegal nga gipasulod sa nasod pinaagi sa lungsod sa Mati.
Mokapin sa 400 ka ihap sa mga langgam ug uban pa nga mga hayop ang nakuha sa operasyon.
Matag usa moabot sa P100 ka libo ka pesos hangtud sa P300 ka libo ka pesos ang kantidad.
Kalakip sa mga nakompiska ang black palm Cockatoo, Sulphur Crested Cockatoo, mga Lory birds, lizards ug Walla Bee. Hugtanon nga gidili sa balaod ang illegal nga pagpasulod sa mga livestock ug langgam sa nasod, gumikan kay gilikayan ang pagsulod sa mga sakit nga posibling dala niini.
Sa bilanggo-an ang napadulngan sa duha ka mga suspek nga maoy gitudlo nga mao ang nag-atiman sa mga hayop nga gikan sa nasod Indonesia.
Una nang naila ang duha nga sila si Joel Toledo ug Lumpas Lomacore.
Sumala kang Jomar gipabantayan lamang kanila ang nahisgutan nga mga hayop ug wala sila masayud kung asa kini gikan.
