Labing menos 44 ka tawo ang namatay human mataob ang usa ka overloaded nga ferry sa Lake Kariba, Zimbabwe.
Sumala sa Civil Protection Unit, adunay sakay nga 114 ka hamtong nga pasahero, lima ka crew member ug wala pa matino nga gidaghanon sa mga bata sa dihang nahitabo ang insidente niadtong Martes.
Gibutyag sa mga awtoridad nga 90 ra ka pasahero ang kapasidad sa maong ferry.
Una nang miingon ang mga opisyal nga 77 ka tawo ang naluwas ug 15 ka bangkay ang narekober, apan misaka ngadto sa 44 ang death toll base sa Zimbabwe Republic Police samtang nagpadayon ang search and rescue operations.
Sumala sa usa ka saksi, mipadayon ang biyahe sa ferry bisan pa sa dili maayong panahon ug posibleng natandog kini sa kusog nga balod nga maoy hinungdan sa pagkataob.
Nangresponde dayon ang mga kasikbit nga bangka, divers, militar ug helicopter aron pangitaon ang mga nawala ug luwason ang mga naluwas.
Ang mga nakit-an nga bangkay gipangkolekta sa funeral parlors samtang padayon ang operasyon sa pagpangita.
Ang Lake Kariba nahimutang sa utlanan sa Zimbabwe ug Zambia ug giila nga pinakadakong artificial lake sa kalibotan. | VIA BOMBO EROS PAJOTA
