Nakadawat og libreng serbisyong medikal ang 266 ka lumad gikan sa 11 ka kultural nga komunidad sa Davao City atol sa gihimong medical mission kabahin sa Kadayawan Week.
Gitumong ang kalihokan sa paghatag og healthcare services sa mga lumad nga gikan pa sa hilit nga lugar sa siyudad ug nanaug aron mosalmot sa nagkalainlaing kalihokan sa Kadayawan.
Lakip sa ilang nadawat ang libreng medical checkup, tambal ug pagkaon samtang naghulat sa konsultasyon.
Usa sa mga nakabenepisyo si Bae Amay Pawan gikan sa Paquibato District, kinsa nagpahayag og pasalamat tungod kay panagsa lamang sila makahigayon nga makakonsulta sa doktor.
Gipasiugdahan ang medical mission nila Congressman Paolo Duterte, Congressman Isidro Ungab, Congressman Omar Duterte, PPP Party-list Congressman Harold Duterte ug Vice Mayor Rodrigo “Rigo” Duterte II.
Tumong sa programa nga madala ang batakang serbisyong panglawas ngadto sa mga lumad nga komunidad samtang nagpadayon ang pagsaulog sa Kadayawan Festival. | VIA BOMBO EROS PAJOTA
