Nagkanayon si Zuleika Lopez, Chief of Staff ni Vice President Sara Duterte, nga “Prepare for Typhoon Inday” sa wala pa siya mibiya sa Senado kaniadtong Huwebes human sa iyang pakigtagbo kang Senate Secretary Renato Bantug Jr. Wala na siya motubag sa uban pang pangutana sa media.
Gipasabot nga bisan adunay bagyong “Inday” nga kasamtangang gimonitor sulod sa Philippine Area of Responsibility, ang “Inday” usab mao ang bansag nga gigamit sa pipila ka mga tigasuporta ni Vice President Sara Duterte.
Giklaro ni Senate Secretary Renato Bantug Jr. nga ang pagbisita ni Lopez sa Senado alang lamang sa administratibong mga butang nga may kalabotan sa ipahigayon nga impeachment trial.
Nangutana pa gani si Lopez kung pila ka mga bisita sa defense panel ang mahimong makasulod sa session hall ug kung mahimo ba nga magdala ang Office of the Vice President (OVP) og kaugalingong media team. Apan gipatin-aw ni Bantug nga dili tugotan ang kaugalingong media coverage sa duha ka panig ug igo na ang media access nga giandam sa Senado.
Gipagawas usab sa Impeachment Court ang subpoena ad testificandum batok kang Lopez aron motungha ug motestigo sa impeachment trial sa Bise Presidente.
Gidawat na usab sa Central Records Unit sa OVP ang subpoena nga gipirmahan ni Senate Presiding Officer Senator Francis “Chiz” Escudero.
Gimandoan si Lopez nga motambong sa Senado sa Hulyo 13 ug 14 aron mohatag og testimonya bahin sa mga isyu nga nalakip sa impeachment case nga gisang-at sa House of Representative.
