DAVAO CITY – Naa na karon sa pag-atiman sa kapulisan ang 8 ka mga vintage bomb nga nakalutan sa nagpadayong construction sa Davao city coastal road ning syudad.
Subay sa report, nakalutan ang nahisgutang mga vintage bomb sa mga trabahante sa coastal road project dapit sa Talolo center beach sa Brgy Talomo ning syudad alas 3 kagahapon sa hapon.
Gikabutyag nga nakuratan na lamang ang backhoe operator sa dihang apil sa mga yuta nga gikalot niini ang nahisgutang mga vintage bombo nga gibana-banang mitimbang ug gikan 15 hangtud 20 ka kilo ang matag usa.
Gilayong mireport ang mga trabahante sa kapulisan ug paspas nga miresponde usab ang mga ginsakupan sa explosive ordinance division sa Davao city Police office.
Sa karon, padayon pang ginasuta sa EOD kung unsa nga matang sa trigerring device ang gibaton sa maong mga bomba.
Apan gitino niini nga adunay dyutay lamang ang posibilidad sa tsansa nga mobusikad pa kini.
Bisan pa niini, dili mokompiyansa ang kapulisan ug ila kining gibutang sa luwas nga lugar nga dili matandog nga moresulta sa kalit nga pagboto niini.
Kahinumduman nga nga niadtong milabay nga senana dul-an 80 usab ka mga vintage bombo ang nakalutan sa usaka backhoe sa Poblacion Calinan ning syudad.
Nanawagan usab ang kapulisan sa katawhan nga i-rerport gilayon sa higayong maka-kalot ug mga ingon niining matang sa mga bomba.
