Gipahibalo sa National Grid Corporation of the Philippines o NGCP nga ipailalom sa Yellow ug Red Alert ang tibuok Visayas Grid karong adlawa tungod sa kakulang ug limitadong reserbang suplay sa kuryente.
Sumala pa sa NGCP, ipatuman ang Yellow Alert gikan alas-2 hangtod alas-5 sa hapon, ug usbon usab gikan alas-8 hangtod alas-9 sa gabii.
Sa laing bahin, ipatuman ang Red Alert gikan alas-5 hangtod alas-8 sa gabii, atol sa peak hours sa konsumo sa kuryente.
Dugang pa niini, gipasabot sa NGCP nga gipailalom sa Yellow Alert ang grid kung limitado na ang operating margin ug dili igo ang reserbang suplay alang sa panginahanglan sa kuryente.
Mahimong mosangpot sa rotational brownout ang Red Alert kung mas ubos na ang suplay kumpara sa konsumo ug dili mapakunhod ang demand.
Sa kasamtangan, giawhag ang mga residente ug negosyo sa Visayas nga kontrolon ang paggamit sa kuryente, ilabina atol sa mga oras nga ipatuman ang maong mga alerto.
