Mahimong makadugang sa panginabuhian sa mga Pilipino ang pagpananom og kahoy ug uban pang kalihokan alang sa pagpanalipod sa kalikopan, subay sa Executive Order No. 127 nga nagmando sa paghimo og nasudnong polisiya sa carbon market.
Tumong sa maong polisiya nga hatagan og oportunidad ang mga mag-uuma, komunidad, ug negosyo nga makakwarta pinaagi sa mga proyektong makapamenos sa polusyon ug greenhouse gas emissions.
Pinaagi sa carbon market, mahimong makakuha og carbon credits ang mga kwalipikadong proyekto nga nagpananom ug nag-atiman og kahoy, naggamit og limpyo nga enerhiya ug nagpahigayon sa ubang kalihokan nga makapamenos sa greenhouse gases. Mahimo kining ibaligya ngadto sa mga kompanyang kinahanglang motuman sa ilang mga pasalig sa pagpanalipod sa kalikopan.
Sumala kang Executive Secretary Ralph Recto, gusto ni Pangulong Ferdinand Marcos Jr. nga dili lamang mapanalipdan ang kalikopan, kondili makahatag usab kini og dugang kita, trabaho ug oportunidad sa panginabuhian, ilabina sa mga komunidad sa kabaryohan.
Apan, kinahanglan nga motuman sa mga sumbanan sa gobyerno ug moagi sa beripikasyon ang mga proyekto sa dili pa makakuwalipikar sa carbon credits.
Ang Department of Environment and Natural Resources o DENR maoy maghimo sa mga lagda ug magtukod sa Philippine National Carbon Registry aron masubay ang mga carbon credit ug malikayan ang pagpanglimbong o doble nga pag-ihap niini.
Samtang, mangulo ang Climate Change Commission sa komiteng motan-aw sa pagpatuman sa polisiya, uban sa Department of Finance isip Vice chairman.
Mahimo usab nga gamiton ang kita gikan sa carbon credits sa pagpondo sa mga proyektong manalipod sa mga komunidad batok sa epekto sa climate change, lakip ang lig-on nga imprastraktura ug mga pasilidad sa tubig.
Giklaro ni Recto nga dili bag-ong buhis sa carbon ang gipahamtang sa maong mandato. Hinuon, naglatid kini sa pundasyon alang sa usa ka reguladong merkado sa carbon credits.
Adunay 30 ka adlaw ang DENR gikan sa pagpatuman sa maong mando aron isumite ang gisugyot ngadto sa komite, nga aduna usab og 30 ka adlaw aron aprobahan kini.
