Gitangtang sa ilang mga puwesto ang tulo ka opisyal sa Department of Public Works and Highways (DPWH) sa Davao City nga giimbestigahan kalabot sa giingong mga iregularidad sa mga flood control projects. Gikumpirma ni DPWH Secretary Vince Dizon ang maong lakang karon lamang adlawa, Oktubre 19, human sa imbestigasyon sa National Bureau of Investigation (NBI) sa mga kwestiyonableng proyekto.
Lakip sa gitangtang sa puwesto si kanhi Davao City District Engineer Richard Ragasa, nga usa sa mga respondent sa mga reklamong gisang-at sa NBI ngadto sa Department of Justice (DOJ).
Sumala sa mga naunang report, gisusi sa NBI ang mga flood control project nga gihatag sa Genesis88 Construction Inc. human makit-an ang posibleng mga iregularidad sa dokumentasyon ug pagpatuman sa pipila ka proyekto. Niadtong Oktubre 13 ug 14, nagsang-at ang NBI og mga kriminal nga reklamo batok sa 21 ka indibidwal, lakip ang mga opisyal ug personnel sa DPWH Davao District Engineering Office ug mga representante sa pribadong construction firms. Lakip sa posibleng mga paglapas nga girekomendar sa NBI ang falsification of documents ug paglapas sa Anti-Graft and Corrupt Practices Act.
Samtang, susihon pa sa DOJ ang mga reklamo aron matino kon adunay igo nga basihan sa pagsang-at og mga kaso sa korte. Gipasalig usab sa DPWH ang kooperasyon niini sa mga awtoridad aron matino ang mga responsable sa giingong mga iregularidad. Bisan pa niini, ang pagkasakop sa imbestigasyon o pagkapasaka og reklamo dili pa nagpasabot nga napamatud-an na ang sala sa mga respondent.
