Hinay-hinay nang sugdan sa Oktubre 29 ang deployment sa mga personnel nga magbantay sa kapin 40 ka mga sementeryo sa Davao City alang sa pagsaulog sa Undas.
Matud ni Retired Police Lieutenant Colonel Angel B. Sumagaysay, Officer-in-Charge sa Public Safety and Security Office o PSSO, gipaabot nga adunay mga residente nga sayo nang mobisita sa mga sementeryo aron makalikay sa daghang tawo ug kahuot sa adlaw mismo sa Undas.
Tungod niini, sayo nang giandam ang pagdeploy sa mga personnel aron masiguro ang kahapsay, seguridad ug kaluwasan sa mga tawo nga mobisita sa mga sementeryo aron sa paghinumdom ug pag-ampo alang sa ilang mga minahal nga namatay. Sumala pa, mokabat sa 15,000 inter-agency personnel ang i-deploy aron mubantay sa mga tawo nga mubisita sa mga sementeryo, samtang mas daghan pa ang itugyan sa mga barangay, kauban ang mga personnel gikan sa City Government of Davao aron motabang sa pagmintinar sa kahapsay ug pagdumala sa kadaghan sa mga bisita.
Sama sa nangaging mga tuig, magpadayon ang pagpatuman sa mga lakang sa seguridad ug kaluwasan panahon sa Undas. Apan, usa sa mga bag-ong pamaagi karong tuiga mao ang pagpalugway sa pagbantay hangtod sa gabii aron matubag ang panginahanglan sa mga tawo nga mobisita sa mga sementeryo bisan sa ulahing mga oras sa adlaw.
Magpadayon ang deployment ug pagbantay hangtod Nobyembre 3, diin gilauman nga makatabang kini sa pagmintinar sa kahapsay sa mga sementeryo ug sa pagseguro nga malinawon ang paghinumdom sa mga namatay sa tibuok panahon sa Undas.
