Magpagawas ang Department of Labor and Employment o DOLE og upat ka labor advisory sa Nobyembre aron mapanalipdan ang mga mamumuo batok sa grabeng kainit nga gilaumang epekto sa El Niño.
Sumala kang DOLE Secretary Francis Tolentino, usa sa mga prayoridad ang kaluwasan sa mga mamumuo nga kanunay nga ma-expose sa init sa adlaw.
Lakip sa giplanong mga lakang ang paghatag og benepisyo pinaagi sa Employees’ Compensation Commission o ECC sa mga kwalipikadong trabahante nga magkasakit tungod sa grabeng kainit samtang nagbuhat sa ilang trabaho. Sakop niini ang mga kwalipikadong mamumuo sa pribado ug publikong sektor.
Gihuman na usab sa ahensya ang mga sumbanan kalabot sa heat index, lakip ang posibleng pagsuspinde sa trabaho kung moabot sa delikadong lebel ang kainit.
Makigpulong usab ang DOLE sa mga kompanya, organisasyon ug mga representante sa delivery riders ug platform drivers aron hisgutan ang posibleng pagluag sa ilang trabaho gikan alas-dose sa udto hangtod alas-tres sa hapon, panahon nga grabe ang kainit sa adlaw.
Kabahin usab sa mga giplanong advisory ang pagsul-ob og komportable apan desente nga sinina sa trabaho, ingon man ang pagpatuman sa staggered working hours o pag-usab sa oras sa pagsulod ug paggawas sa mga mamumuo.
Gipasalig ni Tolentino nga ilang paningkamotan nga mapagawas ang upat ka advisory sa Nobyembre. Gilauman usab sa kalihim ang kooperasyon sa mga employer aron mapatuman ang mga lakang alang sa kaluwasan ug kahimsog sa ilang mga nasakupan.
Video courtesy: Bombo Radyo Philippines | Bombo Ma. Kamila Ysabel Cotoner
