Nagpasidaan ang Armed Forces of the Philippines nga posibleng magpadayon hangtod sa 2028 elections ang giingong mga kalihokan sa China nga nagtumong sa pagdaot sa interes sa Pilipinas, lakip ang mga kalihokan sa sulod ug gawas sa nasud.
Sumala kang AFP spokesperson for the West Philippine Sea nga si Rear Admiral Roy Vincent Trinidad, kabahin ang agresibong mga katikaran sa mga katubigan sa Pilipinas nga giangkon sa China.
Gipunting ni Trinidad ang padayong presensiya sa mga barko sa China sa Bajo de Masinloc, ingon man ang pipila ka insidente sa komprontasyon tali sa Philippine Coast Guard ug mga barko sa Chinese Coast Guard.
Bisan pa niini, gipasalig sa AFP nga magpadayon kini sa pagpanalipod sa soberanya ug teritoryo sa nasud.
Giawhag usab sa opisyal ang publiko nga mag-amping ug susihon pag-ayo ang mga impormasyong gipagawas sa China, ilabina sa mga isyu nga adunay kalabotan sa West Philippine Sea.
