Mosaka sa 70.7 porsyento ang debt-to-GDP ratio sa Pilipinas sa 2027 kung mosamot ang kahimtang sa ekonomiya, sumala sa sensitivity test sa Congressional Policy and Budget Research Department o CPBRD.
Dili kini forecast, kondili alternatibong senaryo sa posibleng risgo sa ekonomiya. Sa baseline scenario sa gobyerno, gipaabot nga 64.6 porsyento ang debt-to-GDP ratio sa 2027, samtang mokabat sa P7.2 trilyon ang gisugyot nga national budget.
Apan sa severe downside scenario, mahimong mohinay sa 3.2 porsyento karong 2026 ug 2.9 porsyento sa 2027 ang nominal GDP growth, nga mahimong mopataas sa debt ratio ngadto sa 66.8 porsyento karong tuiga ug 70.7 porsyento sa sunod tuig.
Sa moderate downside scenario, mahimong moabot sa 67 porsyento ang debt-to-GDP ratio sa 2027 kung mokabat lamang sa 5.9 porsyento ang nominal GDP growth.
Gipasidan-an sa CPBRD nga mahimong mogamay ang fiscal space sa gobyerno kung magpadayon ang hinay nga pagtubo sa ekonomiya, ilabina tungod sa tensyon sa Middle East, taas nga interest rates ug kagubot sa global bond market.
Bisan pa niini, matud sa CPBRD, mahimong mapondohan gihapon ang gisugyot nga P7.2-trilyon nga budget, apan mahimong mas limitado ang kapasidad sa gobyerno sa pag-atubang sa umaabot nga mga krisis ug paggasto alang sa mga prayoridad sa kalamboan.
