Gihangyo sa kampo ni kanhi House Speaker Ferdinand Martin Romualdez kang brodkaster Ramon Tulfo nga bawion ug klarohon ang iyang gipatik nga alegasyon nga sekreto kunong nakagawas ug nakabalik sa New Quezon City Jail ang kanhing opisyal.
Gipahimangnoan sa legal team ni Romualdez si Tulfo nga ilang subayon og tukmang legal nga aksyon kon dili kini motuman sa pormal nga hangyo sa kampo.
Sa sulat nga gipetsahan Nobyembre 4, gipasiugda ni Atty. Felix Michael Villa nga walay kamatuoran ang maong alegasyon nga gipatik ni Tulfo sa Facebook niadtong Nobyembre 3.
Matod sa kampo ni Romualdez, nagpabilin siyang nakapriso sukad sa iyang pagpasulod sa New Quezon City Jail niadtong Setyembre 14, 2026, ug wala pa sukad makagawas sa maong pasilidad.
Lakip sa gipangayo sa iyang legal team kang Tulfo mao ang pagtangtang o pagklaro sa maong post, pagpagawas og publikong katin-awan ug pasalig nga dili na usbon ang pagpakaylap sa susamang impormasyon.
Dugang pa, miangkon si Tulfo nga hinimo lamang ang impormasyon nga iyang nadawat gikan sa iyang tinubdan ug nasayop siya tungod kay wala niya kini una gipamatud-an sa wala pa ipatik.
Bisan pa sa iyang pag-angkon sa sayop, wala pa siya magpagawas og pormal nga pagpangayo og pasaylo kalabot sa maong alegasyon.
