Gipunting sa Department of Agriculture (DA) nga prayoridad niini ang pagpadayon sa pagpaubos sa food inflation alang sa pinakakabus nga mga pamilya sa nasud pinaagi sa mga lakang nga magpabiling barato ang presyo sa mga batakang panginahanglanon nga dili makadaot sa lokal nga produksyon.
Miubos ngadto sa 9.4 porsyento niadtong Oktubre ang food inflation sa pinakaubos nga 30 porsyento sa mga pamilyang Pilipino, gikan sa 9.8 porsyento niadtong Septiyembre.
Sumala sa Philippine Statistics Authority, nakatabang sa pagpahinay sa pagsaka sa presyo sa mga palaliton ang mas hinay nga pagmahal sa isda, mga utanon ug pipila ka klase sa mantika, bisan pa sa taas nga gasto sa pag-ani ug transportasyon.
Apan nagpabilin ang hagit sa presyo sa ubang produkto human misaka ang presyo sa mais, mga prutas ug mga produktong hinimo sa trigo sama sa pan, samtang nagpabiling taas ang inflation sa bugas.
Matod ni Agriculture Secretary Francisco P. Tiu Laurel Jr., maghatag ang ahensya og pinansyal nga tabang, subsidiya sa krudo ug bayranan sa toll, ingon man palapdan ang programa nga “Benteng Bigas, Meron Na!” alang sa mga senior citizen, solo parent ug persons with disabilities o PWD.
Gipasiugda usab sa sekretaryo nga dili lamang ang pagpaubos sa presyo ang angay tutokan, kondili ang pagsiguro usab sa igong suporta sa mga mag-uuma aron mapadayon ang produksyon taliwala sa hulga sa pagbag-o sa klima ug mga krisis sa ubang nasud.
