Nagpasidaan ang People’s Budget Coalition sa publiko batok sa posibleng pagbalik sa mga anomalya sa flood control projects tungod sa giingong padayon nga pagsulod sa mga budget insertion sa mga kongresista sa gisugyot nga 2027 national budget.
Giawhag sa grupo ang publiko nga mas bantayan ang proseso sa paggahin sa pondo sa nasud, nga sumala kanila, dili personal nga kuwarta sa mga kongresista, senador o presidente, kondili pondo sa katawhan nga angay gamiton alang sa ilang panginahanglan.
Sa eksklusibong pakighinabi sa Bombo Radyo Philippines, gibutyag ni AJ Montesa, co-convenor sa People’s Budget Coalition, ang importansya sa partisipasyon sa publiko aron masiguro nga dili magamit sa personal nga interes sa mga politiko ang pondo sa gobyerno.
Gibutyag usab sa grupo atol sa konsultasyon sa Senate Finance Committee uban sa mga civil society organizations ang gibanabanang 7,054 ka proyekto nga nagkantidad og P190 bilyon, nga giingong gisulod sa gisugyot nga 2027 national budget nga walay kaubang public documents.
Lakip niini ang kapin 6,200 ka public works projects nga nagkantidad og P172 bilyon.
Tungod niini, nanawagan ang grupo sa publiko nga aktibong bantayan ang nasudnong badyet aron masiguro nga ang pondo sa katawhan mapadulong sa mga proyekto nga tinuod nga makahatag og kaayohan sa publiko.
