Gibarugan ni Education Secretary Sonny Angara nga ang performance ug kontribusyon sa serbisyo publiko maoy angayng mahimong basihan sa promosyon sa mga opisyal ug kawani sa Department of Education o DepEd, imbes nga ang ilang koneksyon sa politika.
Gipadayag kini ni Angara atol sa iyang mensahe sa unang Literacy and Numeracy Expo cum Training of Trainers on the Institutionalization of Technical Assistance on Instructional Delivery nga gipahigayon sa Iloilo City kagahapong adlawa.
Sumala pa sa kalihim, angay nga ilhon ug hatagan og tukmang oportunidad ang mga kawani nga nagpakita og maayong performance ug matinud-anong pagserbisyo sulod sa kagawaran.
Gipasiugda usab niya nga ang talagsaong pag-alagad sa publiko maoy pangunang sukdanan sa pag-ila sa trabaho ug paghatag og mas taas nga katungdanan sa mga kawani.
Dugang pa niini, walay lugar sa DepEd ang paggamit og koneksyon o politikanhong tigpaluyo aron lamang makakuha og promosyon.
Pinaagi niini, tumong sa kagawaran nga mapalig-on ang propesyonalismo sa mga kawani ug masiguro ang mas maayong kalidad sa edukasyon alang sa mga estudyante sa tibuok nasud.
