Namatikdan sa Philippine Navy ang mokabat sa 80 ka barkong panggubat ug mga barko sa China Coast Guard sa West Philippine Sea atol sa tibuok bulan sa Oktubre ning tuiga. Mas ubos kini kumpara sa 101 ka barko sa China nga namatikdan sa maong kadagatan niadtong Septyembre, sumala sa Armed Forces of the Philippines o AFP niadtong Martes.
Gipasabot ni AFP spokesperson for the West Philippine Sea retired Rear Admiral Roy Vincent Trinidad nga naglakip sa maong ihap ang mga barkong panggubat sa People’s Liberation Army Navy o PLAN ug mga barko sa China Coast Guard o CCG nga nabantayan sa upat ka dagkong bahin sa West Philippine Sea.
Sa Ayungin Shoal, mokabat sa 24 ka barko ang namatikdan, diin 13 niini sakop sa PLAN ug 11 ang gikan sa CCG. Sa Bajo de Masinloc, 41 ka barko ang na-monitor, nga gilangkoban sa 11 ka barko sa PLAN ug 30 ka barko sa CCG. Samtang, 11 ka barko ang namatikdan sa Escoda Shoal, diin walo niini sakop sa PLAN ug tulo ang gikan sa CCG. Sa Pag-asa Islands, upat ka barko ang na-monitor, diin usa ang sakop sa PLAN ug tulo ang gikan sa CCG.
Sumala pa kang Trinidad, nagpakita ang maong mga ihap sa padayon nga presensya sa mga barko sa China sa maong kadagatan, nga iyang gihulagway nga nagpakita sa ilegal, mapugsanon, agresibo ug malimbongong mga lihok, lakip ang giingong paglapas sa internasyonal nga mga lagda ug sa katungod ug hurisdiksyon sa Pilipinas sa kaugalingong kadagatan.
Gipasiugda usab sa opisyal nga ang padayon nga mga lihok sa China nakadugang sa tensiyon tali sa duha ka nasud, busa importante ang makanunayong pagbantay sa maong kadagatan.
Dugang pa ni Trinidad, padayon nga gibantayan sa mga pwersa sa Pilipinas ang mga katubigan sa West Philippine Sea, lakip na ang pagrekord ug pagdokumento sa mga namatikdang barko sa China.
Nakig-alayon usab ang AFP sa Department of Foreign Affairs o DFA kalabot sa mga impormasyon ug dokumentasyon sa mga lihok nga giingong mapugsanon ug agresibo sa mga barko sa China sulod sa kadagatan sa nasud.
Sa kasamtangan, gipasalig sa AFP nga magpadayon kini sa pagtuman sa mandato nga pagpanalipod sa kadagatan nga sakop sa nasud subay sa nasudnong interes sa Pilipinas.
