Gilauman nga moabot na karong adlawa, Nobyembre 2, 2026 sa Pilipinas ang 14 ka Filipino seafarers nga naluwas human giatake sa mga sea drone ang ilang gisakyan nga barko sa Black Sea, duol sa baybayon sa Bulgaria.
Base sa report, sakay ang mga Pilipino sa Contship Jet, usa ka Liberian-flagged container ship nga nagbiyahe gikan sa Haifa, Israel padulong sa Constanta, Romania, sa dihang naigo kini sa tulo ka sea drone kaniadtong Oktubre 28,2026.
Tungod sa grabeng kadaot, naunlod ang barko ug napugos ang mga tripulante sa pagbiya niini pinaagi sa paglukso sa dagat ug pagsakay sa lifeboat. Miabot og duha hangtod tulo ka oras ang rescue operation sa wala pa sila maluwas sa Bulgarian Navy ug Border Police.
Gawas sa 14 ka Pilipino, naluwas usab ang upat ka Ukrainian crew members. Walay nasamdan o namatay sa insidente, ug nakadawat na sila og medical check-up human maabot sa pantalan sa Varna, Bulgaria.
Sumala sa Department of Migrant Workers o DMW, gitabangan usab sila sa labor office sa Philippine Embassy sa Budapest. Miadto pa sa Varna ang staff member nga si Sheila May Navasquez aron susihon ang ilang kahimtang ug mohatag og pinansyal nga tabang.
Gilauman nga motugpa ang mga seafarer sa Clark International Airport karong Lunes, diin tabangan sila sa DMW ug Overseas Workers Welfare Administration alang sa dugang nga medical assessment, psychosocial support ug pinansyal nga ayuda.
Human sa ilang pagpauli, hatagan usab sila og mga opsyon alang sa reintegration, lakip ang training ug skills development o tabang sa pagpangita og trabaho.
