Gisupak ni Defense Secretary Gilberto Teodoro Jr. ang panawagan ni Chinese Foreign Minister Wang Yi nga magmatngon ang Pilipinas sa mga pahayag ug lakang niini kalabot sa West Philippine Sea (WPS), human pasanginlan ang Pilipinas nga wala kuno nagasulti sa kamatuoran.
Sumala kang Teodoro, ang mga lakang sa Pilipinas kalabot sa WPS mao ang pagpadayag lamang sa kamatuoran ug dili angay nga tawgon nga mga bakakon ang mga Pilipino.
Gipunting usab sa kalihim nga dili angay nga diktahan sa China ang Pilipinas kung unsaon pagpadayag sa kamatuoran, ilabina kay anaa na ang 2016 South China Sea Arbitral Ruling nga nagdokumento sa legal nga baruganan kalabot sa panaglalis sa kadagatan.
Reaksyon kini ni Teodoro sa pakig-istorya sa telepono nila ni Chinese Foreign Minister Wang Yi ug Philippine Foreign Affairs Secretary Ma. Theresa Lazaro, diin gipasiugda ni Wang ang pag-ila sa Pilipinas sa One China Policy ug ang pagkamabinantayon sa mga pahayag ug lakang niini kalabot sa giilugang teritoryo.
Samtang, nalambigit usab sa maong panagbinayloay og pahayag ang alegasyon sa China nga gibabagan sa Pilipinas ang pag-apil ni Chinese Defense Minister Dong Jun sa 13th ASEAN Defense Ministers’ Meeting-Plus (ADMM-Plus) nga gipahigayon sa Cebu.
