Nanawagan si bag-ong Bangsamoro Chief Minister Abdulraof Macacua sa tanang political leaders, lakip na sa iyang mga kontra, nga makigtambayayong sa iyang administrasyon alang sa kaayohan sa katawhang Bangsamoro.
Sa iyang inaugural speech kaniadtong Biyernes, Oktubre 30, 2026 human mapili batok kang MP Ahod “Al Haj Murad” Ebrahim, gipasalig ni Macacua nga ipadayon niya ang moral governance agenda nga gisugdan ni Ebrahim atol sa iyang pagdumala isip interim chief minister.
Personal usab niyang gipahayag kang Ebrahim ang pag-ila sa mga sakripisyo, prinsipyo ug pangandoy nga nahimong pundasyon sa maong programa.
Gipasiugda ni Macacua nga dili angay kalimtan ang kasaysayan nga nagdala sa Bangsamoro ngadto sa kasamtangang kahimtang.
Isip kanhi Chief of Staff sa Bangsamoro Islamic Armed Forces, ang armadong pwersa sa Moro Islamic Liberation Front o MILF, matod ni Macacua nga labaw pa sa pagpangulo ang kahulugan sa iyang pagkapili.
Tumong niini, matuman ang saad nga ang katawhang Bangsamoro adunay kahigayonan sa pagtino sa ilang kaugmaon pinaagi sa demokratiko, responsable ug representante nga mga institusyon.
Pagpasalig usab sa bag-ong chief minister nga iyang alagadan ang tanang katawhan, lakip ang mga misuporta kaniya ug kadtong nagduhaduha sa iyang pagpangulo.
Sulod sa sunod lima ka tuig, abli ang iyang administrasyon sa dayalogo, konstruktibong pagsaway ug pagtinabangay sa nagkalainlaing grupo ug institusyon.
Dugang ni Macacua nga pilion niya ang pagpakig-uli imbes sa kasuko, kooperasyon imbes panagsangka, ug ang dugayng pagpalig-on sa mga institusyon imbes ang lumalabay nga kalipay sa kadaugan sa politika.
