DAVAO CITY – Gihatud na sa lubnganan ang usa sa mga nakabsan sa kinabuhi atol sa nahitabong pagpamomba sa MSU – Marawi City nga si Evangeline Aromin.
Nagbanaw ang luha sa pamilya ug mga kabanay atol sa paglubong kaniya niadtong milabayng adlaw sa Barangay New Clarin, Bansalan, Davao del Sur.
Nibuhos ang mga pahasubo ngadto sa pamilya human sa gidangatan sa ilang unica hija nga usa sa pipila ka mga biktima nga namatay sa nahitabong explosion incident sa MSU diin siya nagtudlo isip PE Instructor.
Dala na sa pagdanguyngoy sa pamilya ang ilang panawagan nga hingpit nang makab-ot ang hustisya alang kang Evangeline ug sa daghanan pang mga biktima.
Una pa man kini ilubong, nahatagan ang pamilya og hinabang gikan sa lokal nga paggamhanan sa Bansalan ug Office of the Vice President.
Gawas kang Evangeline, nahatod na sab sa ilang tagsa-tagsa ka lugar ang lain pang nangakabsan sa kinabuhi nga giilang sila Riza Ramos Daniel nga kaubanan sa buhat, ug mga estudyanteng sila Junerey Taub Barbante ug Janine Arenas.
Kahinumduman nga niadtong milabayng simana, naaresto ang usa sa mga accomplices sa nahitabong explosion insident nga si Jafar Gamo Sultan alyas Jaf/Kurot atol sa gipahigayong operasyon niadtong Disyembre 6 sa Brgy Dulay Proper sa Marawi City.
Gikanayon nga kauban siya sa mga suspek nga sila Kadapi Mimbesa alyas Engineer ug Arsani Membisa alytas Khatab nga myembro sa Dawlah Islamiyah – Maute Group ug nagpabusikad sa bomba atol sa usa ka misa sa Dimaporo Gymnasium niadtong Disyembre 3.
Nipasailawom na sa custodial briefing sa AFP ang maong kasabwat.
