DAVAO DEL SUR- Nanawagan karon ang kabanay sa usa ka hamtong nga lalaki nga naanod sa sapa sa Barangay Coronon, Sta. Cruz, Davao del Sur pasado alas 5:00 ang takna kagahapon sa hapon atol sa kusog nga pagbunok sa ulan ngadto sa mga katawhan nga i-report kini sa mga otoridad kung kini makaplagan.
Naila ang biktima nga si Ramil Dulay, 47 anyos, residente sa nasampit nga lugar. Kaganihang buntag nagtinabangay ang mga kabanay sa biktima sa pagpangita niini uban ang Sta.
Cruz Municipal Police Station (MPS) ug ang Barangay Disaster Risk Reduction and Management Office (BDRRMO). Ginasubay niini ang ilawom sa tulay nga posibling nasangitan sa biktima ug sa mga bahin nga anaa sa daplin sa sapa.
Kahinumduman nga nakuhaan ug video ang pagkahulog ug pagkaanod sa biktima sa kusog nga bul-og sa tubig baha.
Gisundan pa kini sa mga nakakita aron nga salbaron ang biktima apan gumikan sa kakusog sa sulog sa tubig wala na kini makita pa.
Ang maong panghitabo gi-report sa kapulisan ug subay sa imbistigasyon, nga buntag pa lamang nagtagay na sumala pa ang biktima sa iyahang mga kaubanan ug sa iyahang pag-uli, minaog kini padulong sa sapa nga anaa lamang duol sa iyahang balay.
Atol sa maong panghitabo walay nakapakgang sa biktima hinungdan nga nawad-an kini ug balanse gumikan na usab sa iyahang pag-inom. Sa karon igo na lamang nga nagbangutan ang kabanay sa biktima.
Kahinumduman nga adunay usa ka hamtong nga lalaki usab ang naanod sa sapa sa Calinan kagahapon sa hapon human nga nahugmak ang gitamakan niining dike, maayu na lamang nga swerteng nakalingkawas kini sa pag-anod kaniya sa baha gumikan sa paggunit niini sa gamot sa kahoy nga anaa na sa 1.5 kilometers ang gilay-on.
Nakuhaan usab ug video ang maong panghitabo.
